【第55屆金馬獎】袁富華廣東話激動致辭 感謝20幾年前一個好儍嘅決定

分享
嵌入
  • 添加 2018年11月18日
  • 資深舞台劇演員袁富華憑電影《翠絲》擊敗一眾對手,成功奪得第55屆金馬獎最佳男配角,袁富華由1995年開始演出多部舞台劇、同時參與唔少港台劇演出,最深入民心嘅一定係《喜劇之王》入面,大聲嗌:「你唔係外賣仔!」嘅嗰位大佬。近年喺《樹大招風》、《竊聽風雲》等香港電影都會見到佢嘅出現。
    袁富華上到台已經眼濕濕,拎出貓紙後笑笑口話:「原來很激動。我的國語不好,我想用我的母語講感受可以嗎?」袁富華以廣東話講出得獎感受:「多謝金馬評審,三十而立、四十而不惑、五十而知天命,三十年前我做舞台劇演員,六年後有個重大決定,係咪繼續做演員,因為覺得冇乜成就,我真係好喜歡做演員,掙扎咗一晚之後決定繼續做演員。好多謝金馬評審對我演出嘅肯定,唔只係一個獎項,而係24年前我作出決定係冇錯嘅!」
    袁富華仲話:「非常感謝金馬評委,我要感謝《翠絲》團隊,演員、導演、舒琪老師,唔係佢推薦我演出呢個角色,我唔會企喺度,仲有我另一半,不過佢喺香港未必睇得到,佢話上台唔使多謝佢,唔係佢喺呢30年嚟默默喺身邊支持我,冇可能有今日。」
    出爐男配角袁富華喺後台接受訪問,佢話:「心情完全未平伏,好似發緊夢,喺香港做咗咁多年舞台演員,只係攞過一次舞台劇男配角嘅獎,其間係有提名過多次,不過每次只係擦身而過,我承認自己好似冇乜獎命。」
    佢仲話:「緊張咗成個月,終於塵埃落定,紅姐都叫我唔好咁緊張,但係對住金馬獎,你話唔緊張呃你嘅,多謝天下一,古老闆真係無話可說,支持我哋呢啲微不足道嘅演員,完全不遺餘力,我好衷心感謝佢!不過都冇諗過會有咁嘅後果,因為從來做演員,領略咗一個道理,凡事係諗過因唔好諗個果,如果諗住個果嘅話,自然會做得唔開心,我一直只係諗住個因,因為我真係好鍾意做演戲,所以堅持咗30年。好多謝金馬獎嘅評審對我喺《翠絲》嘅肯定,佢哋唔單止肯定我得到呢個獎,亦肯定咗我喺20幾年前一個好儍嘅決定,係繼續做演員嘅決定係冇錯。」
  • 电影和动画电影和动画

评论 • 3